لخبطة !

بعد أيام لابئس بها من التخبط الفكري والنفسي نلاقي نفسنا تاني بقه
بقالي كتير مفضلتش صاحية يومين ورا بعض
فهمت حاجات كتير كانت بتتقال ليا بس ماكنتش مصدقاها
مشيت خطوة في طريق إني أبقه أحسن
تصالحت مع نفسي جدا وعرفت إن في حقوق الواحد مينفعش يحس بالذنب إنه
بيعملها عشان إتعود إنه ميعملهاش لإنها أصلا حقه !
هقوم أصلي الفجر وأفطر و بعدين أقعد أذاكر
هرتب أولوياتي بجد المرادي وهنفذ - إن شاء الله-
هعرف مين الأشخاص اللي فعلا يفرقوا معايا ويهموني ودول اللي هعمل كل اللي
أقدر عليه عشان أفرحهم مش ناس مبتقدرش
هحاول بقدر الإمكان أظبط كل حاجة و أقعد مع نفسي قعدة حلوة كدهو
لإني فعلا فعلا قررت إن من هنا ورايح مش هيبقه نفسي ف حاجة أنا أو أي
حد قريب مني ويفرق معايا و متحصلش
كل حاجة هتتحقق إن شاء الله

و إكتشفت كمان إني بحب " إن شاء الله" أكتر بكتير من " بإذن الله" :))

11/2/2012 5.25 am

مزاج !

كوباية شاي مظبوط وأنا بتفرج على حديث الصباح والمساء وبعديها أم كلثوم ع الراديو بتاع جدو

وصوت الدوشة بتاعة الإشارة الضعيفة ،قراية قرآن من مصحف جدو

اللي عمري ما شوفت مصحف زيه وبعدين صلاة في المسجد اللي بيحضني أوي

و بُك أحمر جديد وبرفان ماما جيباهوملي

و أجري ع سريري اللي بيسمع صوت ضحكتي من غير ما أضحك :)

وشوشة

كنت دايماً بتشوفي علاقتكوا زي " الشد بالمحاليق" اللي دايماً بتضحكي لما المستر يقولها
كل واحد فيكو محتاج للتاني وبيلف حواليه وبيفضل يقوى يوم ورا التاني مهما كنتي بستحملي خلي بالك من نفسك ،
هو خلاياه مقوياه، لكن إنت لسه بتتكوني،
استحملي زي ما إنت عايزة بس اوعي تتكسري. مستحمليش وتشكتي عشان محدش بيقدر ده ما إنت ياما إستحملتي وإتقالك أنا مقولتلكيش تستحملي
ما إنت ياما إستحملتي وجع رجليكي بس ف أول مرة هي حست بوجع وقعتك !
و يوم لما تشربي شاي خليه مظبوط ، بطلي تحطي سكر كتير وتقولي يمكن يعادل ملح الدمع اللي جواكي.
بطلي تشوفي آخر مشهد ف الفيلم اللي بيموتك من العياط عشان إنت عارفة إنك عمرك ما ع يطتي عشانه.
ويوم لما تفردي شعرك وتقرري إنك ترقصي باليه ف أوضتك افتكري إن البالرينه مبترقصش ع الهوا،
البالرينه ثابتة ف الأرض وبتتحرك بباقي جسمها، اثبتي خليكي مركز الكون - حتى لو مش لحد- ع الأقل لنفسك.
يوم ما حبيتي تقصي شعرك إتحججتي بإنك عايزة تحرريه من التوك، أديكي قصيتي شعرك وأديكي لسه برضه خنقاه بالتوك !
بطلي تحطي لنفسك حدود وتفتكري إنها لو إتشالت هتتحري لإنها حتى لو مبقتش موجودة
هتلاقي لنفسك حدود تانية عشان تقولي إنها سبب خنقتك.
اتعلمي تحطي كحل من غير ما تدمعي وتلبسي كعب عالي من غير ما تتكعبلي
. لما حد يسألك على الحبوب اللي ف وشك بطلي تقولي أصلي مش بحط العلاج كل يوم متتكسفيش ، قولي بحبها وحاسه إن شكلي هيبقه وحش من غيرها.
يوم ما تبطلي تسمعي رنة الخلخال اللي ف رجلك غيريه أو إسمعي قلبك !
بطلي لما تلاقي ضوفرك مكسور وتقولي هيبقه كويس وهيجمد، لأ مش هيبقه كويس ومش هيجمد ، قصيه واللي هيطلع بعده هيبقه أقوى.
لما تقرري تطيري حرري الحاجات -اللي متقلاكي- المحبوسة جواكي الأول.