ممكن ثانية من وقتك ؟؟ أنا نفسي تفكر بس

مبدئياً كده النوت دي إرتجاليه يعني مفيش تحضير

في أفكار كتير جداً ف دماغي يارب أعرف أرتبها كويس

يارب أعرف أوصل رأيي و بس يلا بينا بقى

بس إوعوا تزهقوا أنا بقولكوا أهو



أه حاجة كمان النوت دي مفيهاش أي حاجة من جوجل

كله كله معلومات عندي سواء درستها أو أعرفها من أي

حد شوفته يعني أستاذ جوجل مساعدنيش ف أي حاجة

خالص خالص أي آية قرآنية مكتوبة أنا اللي حفظاها

و عارفه تفسيرها مش هروح لتفسير القرآن عشان أجيبها

أي تعريف أو أي حاجة يبقى أنا حفظاه أصلا من غير حتى

النوت دي و كمان عشان تصدقوا أنا هكتب تحت كل حاجة

أنا عرفتها منين و الآيات القرآنية عرفاها أساساً

مش هينفع أقنعكوا أو أوصلكوا وجهة نظر

بكلام أول مرة أشوفه و معرفش معناه

و شكراً:) :)



~~~~~~~~~~~~~~~~~~~~



مش عارفة أبدأ إزاي متعودتش أكتب نوتس من النوع ده

بس فجاة حسيت إن في حاجات كتير ممكن أكتبها ف النوت دي



ممكن تفكر ؟؟؟

مش لازم إنت اللي بتقرا لأ

لناس كتير بقابلها في حياتي ممكن تفكر ؟؟

و بعدين حتى ربنا قالنا فكروا ممكن بقى

تقكروا ولا لسه مصممين تكونوا

مش حاجة ؟؟





يعني بجد عيب أوي نعمل حاجات كده من غير

ما نفكر أو نتكلم أو حتى يبقى لينا رأي ف الحاجة

اللي إحنا بنعملها دي مش كده ولا إيه ؟؟

" كفى بالمرء عيباً أن تراه ...له وجه و ليس له لِسان "

" درس الكلام و الصمت _ لغة عربية _ 2 ثانوي عام "



و اللسان هنا مش مقصود بيه اللسان

اللسان حاجة مادية لأ ما كلنا عندنا لسان

حتى الحيوانات عندها لسان ، المقصود بيه الرأي ....التفكير



مش عارفه هتعتبروا دي مقدمة ولا إيه

قولتلكوا مكتبتش كده قبل كده سب لو مقدمة ف إعذروني

إنها طولت



الموضوع بقى إني بعاني من الناس اللي

مش بتفكر ف حياتي بقابلهم كل يوم و بيحصل نقاش

و هما اللي بيبدأو دايماً مش معناه يعني إن البت

فيلسوفة بس الحمد لله بفكر على قدي

على قد سني :)



ممكن أول نقطة الإختلاط :

سمعت كتير جدا من ناس ياما جدااااااا

إن الإختلاط حرام

ماشي هنفترض إنه حرام - و ده مش موضوعنا -طب ما أنا

مُجبرة على الإختلاط ده يعني أنا لازم أتعلم صح ؟؟

ربنا بيحب الناس اللي بتتعلم عشان تنهض ببلادها

و يبقى فيه تقدم حتى لو مش هنهض و الكلام

الكبير أوي ده عالأقل أقل أقل أقل حاجة ممكن

أعملها بالتعلم ده إني كأم - مستقبلياً -أعلم ولادي

ولا إيه ؟؟؟

مش زينة المرأة منزلها ؟؟؟

و الأم مدرسة...........إلخ ؟؟

طيب مهو عشان أتعلم و أعلم ولادي اللي هما هتحاسب عليهم

لازم أختلط بقى يعني لازم أروح مدرسة

لازم أروح دروس

لازم أروح كلية

صح ؟؟؟

طب خلاص أنا مش هتعلم خااااااااااااالص عشان اللي بيقولوا

الإختلاط حرام

طب مش هنزل لاشارع أجيب لبابا علاج عشان تعبان ؟؟

مش هنزل أودي حاجة لأختي عشان بنتها مغلباها و مش عارفه تنزل و تسيبها ؟؟

مش هفتح الباب للراجل اللي بياخد فلوس النور و الميه ؟؟

مش هنشر؟؟؟

يعني الناس مش هتشوفني طب إزاي ؟؟؟ هو ده كلام مقنع يعني ؟؟

طب إزاي بقى عايزني أقتنع ؟؟



نرجع لنقطة الإختلاط تاني : اللي بيقولي الإختلاط حرام

ده مُدرس

طب يا مستر لما هو الإختلاط حرام ليه حضرتك عامل مجموعات بنات وولاد ؟؟

مش المفروض حضرتك عالأقل متعملش كده عشان ربنا هيحاسبك ؟؟

و لما الإختلاط حرام يبقى حضرتك تكلم أي بنت ف حدود الحصة

و الدرس بس متهزرش و متتكلمش معايا خالص حتى لو بتنصحني

متقولش زي بابا مفيش حاجة إسمها زي حضرتك مش بابا يبقى خلاص

مش هقول لربنا أصله زي بابا



أنا مش متعصبة ولا حاجة بس حضرتك قولت حرام

يبقى حرام و المبدأ لا يتجزأ صح ؟؟





خلاص كده كفاية ع الموضوع ده أظن وجهة نظري وصلت

نفسي اللي بتكلم يكون بيعمل اللي بيقوله

مش معنى كده إني مثالية بس عالأقل بحاول

أعمل أي حاجة أقولها او متكلمش أصلاً :)



~~~~~~~~~~~~~~~~~~~~~~~~



إنتي بتسمعي إيه ؟؟



سؤال غبي آسفة على الشتيمة بس وربنا غبي



أنا كل ما أدخل درس أو أي مكان بيقى في ناس

عاديين يعني زمايلي ف الدرس بس مش صحابي

ناس أعرف أساميهم بس

و يلاقوني حاطه الهاند فري و أشيلها بقى

عشان الحصة أو أي حاجة تانية

أول سؤال هو إنتي كنتـِ بتسمعي إيه



و أنتو مالكوا هه إنتو مالكوا؟؟؟

هو إنتو هتتحاسبوا بدالي ؟؟

طبعا بسكت ف تلاقيهم باصيين كده

من فوق لتحت و الرد البديهي

على فكرة الأغاني حرام



لما أسألها عرفتي منين إنها حرام ؟؟

تقولي في حديث طب هو الحديث بيقول إيه ؟؟

آمممممممممم مش فاكرة



طب إنتـِ جيبتي الحديث منين عشان

نروح ندور و نشوف مع بعض

دول بيقولوا هما مين اللي بيقولوا ؟؟

مش بتكلم ف إنو حرام أو حلال دي حاجة

مش أنا اللي أتكلم فيها بس أنا كل فكري

إنك ممشية كل حياتك على حاجة إنتي متعرفيش

هي منين و مش فاكره حتى مين اللي قالهالك ؟؟

هأأو

بجد بقى هأأأأو و أوي كمان



اللي يغيظ بقى بعد كل ده ألاقي موبايلها معليهوش إلا أغاني

طب منين الأغاني حرام و منين بتسمعيها

مممم أصلي مش قادرة مسمعهاش

طب لما أنت مش قادرة جاية تكلميني انا ليه ؟؟



أنا قولت أنصحك

يا شييييخة ؟؟ تنصحيني ؟؟ والله العظيم



لالالالالا بتتكلمي جد ؟؟؟ بتصحيني بإيه بحاجة إنت أصلا

مش عارفة تعمليها ؟؟ طب إزاي عيزاني أقتنع ؟؟



من الآخر أنا تعبت و مش هرد عليكو

تاني و مش هتناقش كل واحد بيراحته و كل واحد

هيتحاسب لوحده



أمشي من هنا يلا



البقية :)

~~~~~



ربنا مش هيقولي إعملي حاجة و هو عارف إني مش هقدر



مروتي حبيبتي حبيبتي

بموت فيكي وربنا



إحم إحم خلاص خلاص مش وقتوه :)



إنتـِ صح صح بجد

أصل ربنا ده بيحبنا أوي أوي

يعني أكتر ما كل واحد فينا

بيحب أغلى حد عنده

ف مش معقول ربنا هيقولنا إعملوا حاجة و هو عارف

إننا مش هنقدر ف يعاقبنا لأ طبعا

ربنا بيحبنا أصلا مش جايبنا الدنيا عشان يعذبنا



هو مقلناش إعملوا حاجة و الحاجة دي إحنا

منقدرش عليها

هي ممكن إحنا بس اللي مش قادرين عليها

يعني أنا و إنت و جارتنا و صاحبتي ع الفيس



لكن ممكن لناس تانية هي أصلا مش فارق معاهم خالص خالص

يعني أنا وإنت مثلا مش بنقدر منسمعش موسيقى

بس مامتي و مامتك بعيداً إنها حرام او حلال

هما معندهومش وقت

و حتى لو عندهم في حاجات أهم

ف

موضوع القدرة على الإستغناء على الحاجة دي يختلف من شخص لآخر

لكن ربنا مثلا مش هيقولنا متشربوش لأنه عارف إن كلنا هنشرب كلنا

و هو مش خالقنا عشان يعذبنا



بأسهل مثال

ممكن المستر يدينا واجب 10 صفحات واللي مش هيخلصهم هيضربو



إنت ممكن تعمليهوك كلهم ممكن حد تاني ميكملهومش صح ؟؟



هو هيضربوا عشان إنت عملتيهم أهو يعني الموضوع مش معجزة ولا حاجة

الفكرة إنك إنت قدرتي هو لأ



لكن المستر مش ممكن يديكوا واجب 100 صفحة لأن كلكو مش هتعملوه و هو

مش عايز يعاقبكوا يعني بالعكس هو عايز مصلحتكوا بس :)



~~~~~~~~~~~~~~~~~~~~~~~~~



أي حد بيتكلم من غير ما يفكر



يا جدعان ده ربنا اللي هو ربنا قال فكروا





و سخر لكم ما في السماء و ما في الأرض جميعا منه إن في ذلك

لآيات لقوم يتفكرون "





الجاثية _12



أهو لقوم يتفكرون لازم نفكر

لازم بجد عشان نقتنع باللي بنعمله

عشان محدش يقدر يهزنا

عشان نبقى إحنا مش هما



يعني أنا أفضل إني لو مش بصلي أروح لواحد ماكنش بيصلي

و بقى بيصلي



بجد



مش عشان حاجة عشان اللي ماكنش بيصلي ده أكيد في حاجة

أقنعته في حاجة هزته من جوه خلته يصلي



مش هسأل واحد من أول ما كبر و هو بيصلي و هو أساسا

مش عارف ليه لو سألته هيقولك فرض بس كده

يعني إنت بتصلي عشان هو فرض ؟؟ أو إنت

بتصلي عشان باباك ميزعقش ؟؟

طب فين ربنا ؟؟ فين ربنا من كل ده ؟؟



الصلاة مش مهم فرض ولا سنة

الصلاة بالنسبالي وقت ربننا محددهولي

ينفع أقابله فيه هو بيناديني أنا لو بحبه أوي

هروحله من غير ما تكون الصلاة دي فرض



الصلاة دي مش الصلوات الخمسة بس لأ

الصلاة دي ف أي وقت

هو ربنا بيقولنا أنا معاكوا أي وقت تحتاجوني أنا جمبكوا



يعني أنا ممكن أصلي و أنا تعبانة و أنا زهقانة

أحكي لربنا أه هو عارف بس هو أكتر واحد

هيحس بيا أكيد مش هو اللي بيحبني أوي

أكتر من أي حد



نِفسي اللي يحاول يقنعنا بحاجة

- نا ضمير على اللي ف سننا اللي بيفكروا -

ميستهترش بعقولنا

إحنا بنفكر يعني

مينفعش شيخ يقول المرأة عورة و الإختلاط حرام

و ألاقيه طالع ف برنامج مع مذيعة مش عارفة هي لابسة

ولا مش لابسة طب إزاي ؟؟ حضرتك بتغض بصرك إزاي بقى هه ؟؟



مينفعش حضرتك تقول صوت المرأة عورة

و تفتح خط ف برنامج حضرتك طب مش صوت المرأة

عورة ؟؟؟ تخيل حضرتك بقى بتسمعوه و كام غيرك بيسمعوه

بسببك هو ده مش حرام ؟؟؟



مينفعش حضرتك تقول التعصب حرام و إحنا مش متعصبين

و لما تشوفني ف لشارع تبوصلي من فوق لتحت كأني

أجرمت ؟؟



مينفعش حضرتك أول ما حد يكلمك أو يشوفك تسأله

إنت حافظ كام جزء ف القرآن متهيألي مش مهم ولا كلمة لو مش هنعمل بيها



ممكن لو سألته إنت بتنفذ إيه من اللي ربنا

قالك عليه هتبقى أحلى صح ؟؟

مع إن حضرتك مش من حقك دي حاجة بينه و بين ربنا



ربنا ده حبيبي و أغلى واحد ليا ف الدنيا

إزاي محبهوش و هو جمبي علطول ؟؟



طب هو لو أي حد بيكلم حبيبته أو خطيبته ع الموبايل

بيخلي صحابه و قرايبه يسمعوه ؟؟



لا دي حاجة بينهم بس

هو كده بالظبط علاقتي بربنا علاقة خاصة بيا



مش صلاواتي هي اللي هتحددها

ولا لبسي

ولا صومي

ولا صدقتي

دي علاقة محدش يعرفها

غيري أنا و ربنا و بس



~~~~~~~~~~~



أنا طولت أووووووووووووي أنا عارفة بس معلش دي مجرد وجهة نظر

مش بفرضها على حد أنا أصغر من أصغر واحد هيقرا الكلام ده - ماعدا مروة :D -



آسفة على أي أخطاء إملائية كنت بكتب بسرعة عشان منساش حاجة



النوت دي إهداء لمروة عبد الظاهر

أكره

أكره السخفاء

أكره إختلاطي بِهُم

أكره كوني مُجبرة على ذلك



~~~~~~~~~~~~~



أكره الكلام الكثير

أكره الصمت

أكره فِعلي للإثنين



~~~~~~~~~~~~~



أكره المُجاملة

أكره أن أُجَامَلْ

أكره أن أضطر أنا إليها !



~~~~~~~~~~~~



أكره الإستغلال

أكره أن أُستَغَلْ

أكره أن يستغلَني من هُم قادرون

بكلمة واحدة صادقة أن يحصلوا على كل

ما يريدون بكامل إرادتي



~~~~~~~~~~~



أكره الكاذبين

أكره مَعرفَتي لكذبهم

أكره كونهم مُقربين لنفسي



~~~~~~~~~~~



أكره المظاهر

أكره من يهتموا بِها

أكره من يُحِبَني لمظهري



~~~~~~~~~~~



أكره الفُراق

أكره الإحساس بِه

أكره أن أسعى إليه



~~~~~~~~~~



أكره الكره

أكره أن أكره

أكره أن يصل بي المطاف أن أكره من أحببت