كان نفسي حياتي تبقى أون لاين !
كانت هتشوفني جارتنا العجوزة وانا ببصلها وهي بتنشر ف البلكونة اللي
تحتينا و فرحانة ، وانا ببصلها و هي نازلة تجيب حاجات من السوق 7 الصبح
.
.
كانت هتعرف إننا لما بتيجي عنينا ف عيون بعض كنت بضحكلها
مش بضحك عليها :)
ممكن كان صاحب شِركة الأقلام اللي بحبها لما يشوف
قد إيه أنا مجنونة بيهم و إن عندي 10 أقلام نفس النوع مع إختلاف
الخطوط على جومتين على كام هعلبة ألوان كان يديني زيهم
هدية مثلًا !!
أو ممكن بابا لما يعرف فرحتي بالحاجات الحلوة اللي
بيجيبهالي بليل و هو جاي من الشغل عمره ما كان
ييجي يوم يقولي معلش نسيت
كان عرف حبيبي أنا بعمل إيه فيَّا و إحنا زعلانين . . .
متهيألي مكناش هنزعل تاني .
كنت هعرف إن صاحبتي هتشوفني و أنا بشتكي منها لواحدة
تانية فمكنتش هعمل كده و كنت هروح أقولها علطول إني زعلانة
منها ف كده و كده.
كان عرف كل واحد بيحبني قد إيه أنا بحب حبيبي
ف كان هيصرف نظر من غير ما تيجي مني .
كانت ممكن تيته لما تشوف الكذا نوع دوا اللي في شنتطي
متعيطش بالساعات على شبابها اللي ضاع ولا على برشام
الضغط اللي بتاخده !
كان عِرِف خالي قد إيه بحب الموسيقى و ماكنش
بصَّلي و أنا بسمعها على إني بعمل حاجة غلط.
كان عِرِف المستر قد إيه تعِبت و أنا بعمل الواجب
اللي محدش خلَّصه غيري و ماكنش قالي هي دي
وظيفتك الطبيعية
،،
الواجب اللي من يوميها بعمله
.
.
و بسيبه ف البيت
كان هيعرف الكابتن بتاعي إني على قد ما كنت
داخلة البطولة و نِفسي أكسبها عشان تعِبت بجد
.
.
كان نِفسي أشرفه
و تبقه البنت اللي قالها قبل البطولة بيوم هتروحي على
ضمانتك و مليش دعوة بيكي و عارف إنك هتخسري
واللي يوم البطولة الصبح كل كابتن كان
مع ولاده و هي كانت لوحدها
هي دي اللي البنت الوحيدة اللي عجبت الحكم
بجد و هي اللي الكابتن كان واقِف يقول
البنت دي أنا اللي بدربها
و بيشاور عليها لكل اللي حواليه
.
.
وبيضحك ، الضحكة اللي مشافتهاش من يوم ما
قالتله إنها نازلة البطولة دي
كان أول ولد حبيته هيعرف أنا كنت متعلقة بيه إزاي
و ماكنش هيعاملني كده ، وكان عِرِف إني لما بسيب حاجة
عمري ما برجعلها تاني فماكنش هيبتسم و أنا بقوله مش
عايزة أبقى معاك و هو مفكر إن كلها يومين و نرجع لبعض تاني.
حتى أنا . . . كان يمكن أعرف نفسي كويس لو شوفتني !!
متهيألي كانِت هتفرق :)
بسنت
