فاكِر ؟؟
إحنا أصلاً مكوناش نعرف بعض ... إنت الوحيد يوميها
اللي شوفنا بعض و بعدين إتكلمنا يعني ماكنش في
مجال إني أتصدم في حاجات كنت مفكراها فيك و طلعت
مش موجودة أو العكس.
كنت أعرفهم كُلُهم ماعدا إنت
كانت أوِل مرة في حياتي أخرُج لوحدي
كُنت فرحانة أوي
طب فاكر لما كنت بتضايق و إنت الوحيد
اللي كُنت بتِعرف تخرجني من اللي أنا فيه ؟
كنا صحاب بس ... بس عارف كنت أول واحد
بفكر فيه لما بزعل من أي حاجة أوي من أي حد
كنت بفرح أوي بعد ما أكلمك إحساس جميل
إنك تروح شخص مُعين عشان عارف إنه هيفرحك
و يطلع إختيارك صح.
فاكر لما كنت بتسألني عن الحب و حياتي
الشخصية و كده ؟؟ على فكرة كنت عارفة
طب فاكر بقى يوم ما قولتلي أنا معجب بيكي
و مش هقدر أقولك أكتر من كده عشان لو إحساسي
طلع غلط مظلمكيش معايا....
فاكر ؟؟؟
يوميها إنت قولتلي بحبك بعديها بشوية
أناكنت ميته على نفسي من الضحك
إن حتى مقدرتش تستنى لتاني يوم.
فاكر لما قولتلي إن الحياة بعد الإرتباط هتختلف ؟؟
عارف كان نفسي تختلف بس الحقيقة إن الحياة
مختلفتش .... أنا مأثرتش
أنا لو أثًّرت كان بان بس أنا بجد مأثَّرتش
فاكر المسجات الكتيييير اللي كلها مضمونا خايف ؟؟
عمري ما فهمت إنت كنت خايف من إيه
و كنت علطول بطمنك و بقولك متقلقش أنا
جمبك " أهو " بس تصدق أنا فهمت دلوقتي.
فاكر لما وصلت لمرحلة إني بقيت أقولك
خلي بالك من الحاجات دي عشان بتضايقني ؟
ساعتها فعلا حسيت إنك مش حاسس بيها و
عمرك ما هتاخد بالك
طب فاكر لما كنت بتعملها تاني ؟؟
عارف أنا لو مكنتش عرفاك كنت قولت
إنك بتحب زعَلي بس لأ أنا عرفاك إنت ماكنتش
و مش هتكون كده.
و فضلت تعملها برضه و كنت بتسألني مالك
كنت بقول مفيش
تعرف أنا كان نفسي مرة تصمم إنك تِعرَف في إيه
أو حتى تفتكر كل حاجة حصلت عارف إنت لو كنت
فكرت شوية بس كنت هتعرف مالي.
فاكر لما قولتلك هبعد ؟؟
فاكر كان إيه ردك ؟؟
ماشي بس ياريت نفضَل صُحاب
صُحاب ؟؟؟
طب فاكر بعديها بقى ........
لأ متهيألي مش هتفتكر حاجة إنت أصلا متعرفش حاجة
يااااااااااااااااااه ده أنا حصلي حاجات كتير أوي و إنت بعيد
عارف أنا أكتر حاجة وجعتني في الحاجات دي إيه ؟؟
إنت
عارف أنا كل يوم كل ثانية كان بيبقى نفسي تسأل عليا
تطمن بأي صفة بقى أختك حبيبتك حتى لو صاحبتك
بس ماكنتش بتعمل حاجة :(
عارف كتير كنت بشوفك فرحان بجد كنت ببقى فرحانة اوي
كذا مرة أبقى هبعتلك أقولك وحشتني بس مبعتش
مش عارفه ليه ؟؟
ممكن أكون بصعب عليا يعني بعد كل ده
حتى مش فاكرني ؟؟
ف الآخر أحب أقولك إن عادي على فكرة
أنا مش موجوعة ولا زعلانه مش معنى كده
إنك مش فارق معايا أو كرهتك لأ
إنت برضه هتفضل الشخص الوحيد اللي لما
بفتكره في أي موقف وحش لو بموت من العياط
بيطلعني من المود ده بصوت ضحكه منه بتخيلها
او كلمة مني كان بيعلق عليها
........
و معلش بقى لو زعلتك أنا ف يوم
أو حسستك بأي إحساس وحش
بجد ماكنش قصدي
سلام و هقفل
مش هستناك تقولي لأ إقفلي إنتـِ الأول :)
