مش عارفه اقولك إيه ولا إيه بس فجأة جالي إحساس إني عايزة أقولك حاجات كتير أوي..
عارف يعني إيه أحس معاك بإحساس عمري ما حسيته مع حد ؟؟ أو يعني إيه تبقى واحشني
أوي و نفسي أشوفك أوي و أشوفك ؟!
طب عارف يعني إيه أبقى لابسة طقم معين نفسي تشوفني بيه و ماشية مَشية مخصوصة
ليك و طول ما أنا ماشية شيفاك في كل حد بيعدي من قدامي و اتمنى انه يكون انت بجد
عارف يعني إيه أفقد الأمل تماماً إني أشوفك و خلاص و أنا عيني ف الأرض و مش واخده بالي
من حد فجأة أبص قدامي ألاقيك ؟؟ .........
عارف يعني إيه أبقى ببصلك و أنا خايفة إنك تشوفني بس أنا من جوايا نفسي عيني
متتشالش من عليك ؟؟ ... تعرف بحس بإيه لما بشوفك بتبصلي و انت مش عايزني
اشوفك .... عارف أنا ببقى شيفاك بس مش ببصلك ممكن عشان مش هستحمل عيني
و عينك يتقابلوا ......
تعرف بحس بإيه و أنا بكلمك بكل برود و بقولك مينفعش ؟؟ تعرف ببقى خايفة قد إيه
إنك تسمع كلامي و تسيبني ؟؟ طب تعرف ببقى فرحانة إزاي لما بتقولي إنك برضه
هتفضل جمبي
عارف ببقى حاسه بإيه و إنت بتقولي لأ مينفعش كده أو بتعلق على حاجة معينة
عشان خايف عليا ... أنا بآوح و بعمل نفسي متضايقة بس بجد ببقى فرحانة كفاية
إني مش هعمل الحاجة دي عشان إنت عايز كده
عارف يعني إيه أفضل طول اليوم زعلانة و نظرة منك تخليني في قمة السعادة ؟
و يعني إيه و أنا بكلمك مش بسمع غيرك ؟ بجد مش بسمع غيرك حتى لو كلام
أهبل أوي أو أي حاجة و خلاص أنا ببقى معاك إنت و بس ..
سعات بضحك لوحدي كده ف نص الكلام أنت بتستغرب صح ؟؟
أنا عارفه بس أنا ببقى فرحانة أوي لدرجة إني مش بقدر أخبي ضحكتي
عارف يعني إيه أحسد صاحبك بجد بحسده أوي إشمعنى هو معاك علطول؟؟
حتى لو مش مع بعض بتتكلموا ف التليفون... علطول بيخرج معاك و بيختار معاك
كل حاجة بتشتريها إشمعنى هو أول واحد يشوفك بالطقم ده ليه مش أنا ؟؟
أنا عارفه إنك خايف إن ميكونش عندي نفس المشاعر اللي عندك
.
.
مستني مني كلمة واحدة تطمنك بس عارف ...
أنا مش هقولها
بجد مش هقولها
مش عشان خايفة أو حاجة بس عشان نفسي بجد أقولهالك و أنا قدامك
عايزة أشوفك ساعتها .... أشوفك و إنت فرحان و نفسك تعمل حاجات كتير
نفسك تاخدني ف حضنك و تقولي و أنا بجد عمري ما هسيبك ... و عنيك
بتدمع و بتقول ياااااااااه أخيراً بعد كل ده ....
نفسي أحس منك كل ده من غير ما تتكلم ولا كلمة من عنيك بس
عارف إنت ساعتها لو قولتيلي أي حاجة هعيط .... هعيط بجد
أصل إنت متعرفش أنا ب ___
لآ أنا قولت إني مش هقولهالك دلوقتي
معلش طولت عليك شوية صغنتتين - بالنسبة للطبيعة الأنثوية في حب الرغي ف هما صغنتتين- بس
كان لازم تعرف مني كل ده
باي باي بقى
